Лука Модриќ можеби денеска ќе го игра својот последен натпревар во дресот на Реал Мадрид. Секој следен може да биде негов последен во случај на пораз и испаѓање на тимот од Светското клупско првенство, бидејќи по тоа станува слободен агент. Се очекува дека нема да биде долго под тој статус, туку дека ќе потпише за Милан.
Тоа ќе биде првата промена на клубот за Модриќ од 2012 година, кога го замени Тотенхем со Реал. Во меѓувреме, тој стана рекордер на мадридскиот гигант по бројот на освоени трофеи (28) и капитен на тимот.
Еден од оние што ја носат лентата за време на отсуството на Модриќ од теренот е Федерико Валверде, кој има само пофални зборови за Хрватот.
„Лука Модриќ е пример за углед, многу важен за сите нас. Тој освои сè, не му треба ништо да освои за да биде сакан од целиот свет. Ние сме првотимци сега, но тој и натаму е најфалениот играч на теренот. Тој е пример за сите, секогаш ќе биде, дури и ако нè напушти. Тој секогаш ќе биде наш Лука Модриќ, секогаш Златна топка, наша десетка. Тоа никогаш нема да се промени“ – вели Уругваецот, притоа дополнувајќи низ смеа:
„Можам да кажам само едно лошо нешто за него, а тоа е дека многу се лути кога нема да победи на тренинзите“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
