Вардар се враќа на првата позиција на табелата во групата Б, по триумфот против Целје со 35-30, во натпреварот од 12.коло од групната фаза во Лигата на шампионите. Вардар ја потврди фаворитската улога и на две кола пред крај на групната фаза со девет победи е прв фаворит за лидерската позиција која носи директен пламан во четвртфиналето во Лигата на шампионите. Во преостанатите два натпревари со Кристијанштад дома и со Мешков Брест во гости, на македонскиот првак доволни ќе му бидат и три бода за да ја задржи лидерската позиција во групата.
Од првата до последната минута, Вардар имаше контрола на играта и на резултатот, одигра стабилно во одбраната и максимално рационално во нападот. Вардарци сигурно го почна натпреварот, ја користеше секоја шанса и имаше целосна конктрола на играта. Веќе по девет минути игра домаќините дојдоа на солидни четири гола преднсот. Серијата од 4-0 ја отвори Иван Чупиќ со погодокот од седмерец, а потоа три гола во серија додаде Алекс Душебаев за водство на Вардар од 7-3.
Сигурната игра во одбраната на 6-0 и Арпад Штербик на голот не им оставаа многу простор на гостинските ракометари да дојдат до погодок. Но, Целје умешно ги искористи двете минути кога „црвено-црните“ беа со играч помалку по икслучувањето на Стојанче Стоилов и со два погодоци на Блаж Јанц успеаја да намалат на 10-8 на почетокот од втората четвртина од натпреварот.
По тајм-аутот на Раул Гонзалес, Вардар заигра поагресивно, ја смени одбраната во 5-1 со Алекс Душебаев напред и со три гола во серија, од кои два ги реализира пикерот Рожерио Фереира, вардарци во 23.минута дојдоа на највисоки +6 (16-10), а на полувремето заминаа со предност од 20-15.
Односот на силите остана непроменет и во второто полувреме. Целје се обидуваше, но не успеа да најде соодветен одговор за речиси беспрекорната игра на „црвено-црните“ и да ја анулира предноста на домаќинот. Вардар играше мирно и на сигурно, зголемувајќи на 29-23, а потоа и на 31-24 на десет минути пред крај. Последните минути од дуелот беа само рутина, вардарци ја имаа контролата и ја одржува предноста, а Целје немаше сили да направи уште едно големо изненадување како тоа во претходното коло против Кјелце.
Алекс Душебаев беше лидер во нападот на Вардар со осум погодоци, по шест гола постигнаа Тимур Дибиров и Данил Шишкарев, пет погодоци додаде Игор Карачиќ. Арпад Штербик го заврши мечот со 12 одбрани. Кај Целје, најефикасен беше Жига Млакар со осум гола, Блаж Јанц и Кристијан Бечири постигна по четири погодоци.
До крајот на групната фаза на „црвено-црните“ им остануваат уште два натпревари. Во следното коло на 4 март, вардарци му гостуваат на Мешков Брест, а во последниот натпревар, на 12 март го пречекуваат Кристијанштад.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
