Вардар уште еднаш ја потврди својата доминација кога станува збор за кошарката во помладите категории, освојувајќи ја титулата за генерацијата до 16 години.
„Црвено-црните“ вечерва за противник во финалето го имаа тимот на Феникс, по голема битка успеаја да триумфираат со 75-71. „Вардарци“, кои беа и домаќини на завршниот турнир, подобро го отворија натпреварот и уште во првата четвртина поведоа со 15-6. Феникс не се предаде, успеа да се врати резултатски, па потоа и да поведе со 65-63. Сепак, во клучните моменти Вардар беше подобар тим на теренот, успеа да создаде предност и да се закити со трофејот.
Адриан Наумовски со 22 поени беше најефикасен кај победничкиот тим, пред Лука Наумоски со 15 и Јованов со 10, додека најдобар поединец кај поразениот Феникс беше Кацарски, кој оствари дабл-дабл од 18 поени и 12 скокови.
Вардар покрај оваа титула го освои првото место и во М20 конкуренција, во М18 стигна до втората позиција, додека во М14 завршниот турнир го освои четвртото место.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
