Три бода на последните два натпревара од годината за потврда на првото место во групата А. Пред овој предизвик стои бранителот на трофејот во СЕХА лигата, македонскиот и европски првак Вардар. Првата шанса за трите бода е веќе вечерва (20.15) во „Јане Сандански“ против Татран Прешов.
Вардар е лидер на табелата со 21 бод по осум одиграни кола на кои има седум победи и еден пораз. Најблизок конкурент му е Мотор Запорожје, единствениот тим кој сезонава го победи Вардар во регионалното натпреварување со 18 бода. Татран е третопласиран со 15 бода. На првиот сезонски дуел, Вардар славеше на гостувањето, убедливо со 22-29.
„Го играме последниот натпревар пред нашите навивачи во 2019 година. Целта е да одиграме најдобро што можеме и да го завршиме регуларниот дел од сезоната на најдобар можен начин. Секогаш, нашата цел е победа“ – вели во пресрет на натпреварот, крилото на Вардар, Димитар Димитриоски.
Вардар е сигурен учесник во четвртфиналето и директно ќе игра во оваа фаза како првопласиран во групата. Директно место во четвртфиналето има и за второпласираниот тим, а екипите од третата до шестата позиција ќе разигруваат во осминафиналето.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
