Вардар е првиот учесник на фајналфор турнирот од Купот на Македонија откако „црвено-црните“ излегоа како победници на турнирот што се играше во Битола, каде организатор беше Е. Пелистер 2. Откако во четвртокот славеа на големото дерби со првиот тим на Пелистер, „црвено-црните“ денеска забележаа две нови победи, за вкупно три триумфи во „градот на конзулите“ во изминатите три дена.
Вардар во полуфиналето беше подобар од екипата на Бутел со резултат 33-30, а во финалето скопските „црвено-црни“ се сретнаа со вториот тим на Е. Пелистер. Очекувано, фаворитската улога беше оправдана и скопскиот клуб со победа од 28-25 го чекираше својот билет за Ф4.
Целата работа беше завршена уште во првото полувреме што „вардарци“ го добија со 18-9, младите битолчани во вториот дел ја намалија големата негатива, но немаа сили да ги замрсат сметките на фаворитот.
Пинто со девет и Срдановиќ со шест погодоци беа најефикасни во таборот на Вардар, додека кај Е. Пелистер 2 најистакнати беа младинските репрезентативци Белистојановски со шест и Калајџиоски со четири погодоци.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
