Возачот на Ред Бул, Макс Верстапен, по победата во Остин изјави дека сега постои шанса да се освои петто едноподруго првенство во Формула 1.
Холандскиот возач го забележа 68-от триумф во својата кариера на патеката во Остин, воедно и петти во сезоната, со што ја намали разликата со водечкиот тандем на Мекларен. Оскар Пјастри (кој ја заврши трката во Остин на петтото место) го предводи генералниот пласман со 346 поени, второпласираниот Норис е 14 бода зад него, додека Верстапен е трет со 306 бода.
„Ова е неверојатен викенд за нас. Знаев дека трката нема да биде лесна. Мислам дека ако ја погледнете целата трка, темпото меѓу мене и Ландо (Норис) беше многу слично. Мислам дека направивме разлика на првите гуми (средно тврди). Успеав да изградам мала предност и тоа е она што го задржавме до крајот“, рече Верстапен.
До крајот на шампионатот остануваат уште пет тркачки викенди, а Верстапен зборуваше за своите шанси за титулата, кои по првата половина од сезоната изгледаа речиси невозможни.
„Да, дефинитивно има шанса. Само треба да продолжиме да имаме вакви викенди до крајот. Ќе пробаме сè што можеме. Возбудливо е и многу сум возбуден за крајот на сезоната“, рече Холанѓанецот, кој исто така славеше во Остин на спринт трката во саботата.
Второто место на трката во Остин го освои Норис, додека возачот на Ферари, Чарлс Леклер, исто така, се искачи на подиумот.
Токму борбата меѓу Норис и Леклер ја одбележа трката во САД, за што зборуваше возачот на Мекларен.
„Помина малку време, но беше добра борба со Леклер – тој се бореше напорно. Беше тешко, дадовме сè од себе. Мислев дека ќе биде полесно откако го заобиколив првиот пат (21 круг) и откако останавме подолго на патеката. Очекував второто престигнување да биде полесно (Леклер на средно тврди гуми, Норис на меки). Чарлс возеше одлична трка и беше добра борба“, рече Норис.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
