Во најновата епизода на спортскиот подкаст „ПРЕСИНГ“ на ЕКИПА.МК гостуваше едно од најголемото имиња на македонскиот спорт во историјата, Владо Илиевски.
Но, Илиевски и дефинитивно не е само спортска икона на Македонија, туку пред се и човек со огромно срце, хуманитарец кој долго време е вклучен во бројни хуманитарни мисии како почесен амбасадор на Меѓународниот сојуз за цивилно општество. Сето тоа, како начин за поддршка на лица на кои им е потребна помош, и поради личното искуство и борбата со аутизмот на неговите двајца синови Лука и Јакоб.
Владо, и во „ПРЕСИНГ“, отворено и искрено, зборуваше за проблемите со кои се соочувало неговото семејство во минатото, но и максималната борба негова и на неговата сопруга, истакнатата словенечка кошаркарка Ања Вилфан Илиевски, инаку ќерка на легендарниот југословенски кошаркарски ас, Петар Вилфан, кој е едно од најголемите имиња во историјата на европската кошарка, да им се помогне на нивните деца да добијат среќно детство и посреќна иднина.
„Бидејќи во семејството имавме проблем, затоа што моите деца, нели, се со посебни потреби, па моравме да бидеме постојано со нив цело време. Па, искрено кажано, и мојата фамилија којашто е овде во Македонија ја немав видено едно две години“ – вели Илиевски во „ПРЕСИНГ“ притоа откривајќи за целата таа своја борба на своите деца да им овозможи, заедно со сопругата Ања, среќно детство.
„Знаеш како, сфатив во животот една работа – дека родителите за своите деца ќе направат сè. Тука нема условно, ама баш ништо. Значи правиш сè за своите деца. Така и ние. Дефинитивно имало тешки моменти, многу и психички и физички исцрпувачки. Но, на крај како родител едноставно ги наоѓаш последните атоми од некои сили да бидеш тука со нив, едноставно да држиш здрав разум и да излезеш од тоа како победник. Во смисла, животот да продолжи да тече, да се најдеш себеси, но и да им го најдеш и на нив местото каде што тие ќе бидат најсреќни“.
Владо Илиевски, сепак, и со совет за сите родители кои имаат дечиња со посебни потреби и на кои треба максимално да им се посветат.
„Но секогаш кажувам, не смееш да заборавиш и на самиот себе, односно на нас како родители, затоа што ние сме тие кои што мора да бидат и здрави и способни, за да може секогаш да бидеме тука за нив. Дефинитивно, секогаш кога зборувам со родители со истиот проблем им давам поддршка, им пружам некоја и помош и совет, дека едноставно мора да гледаат прво на себе, бидејќи така единствено ќе може да им помогнат и на своите деца“ – вели македонската спортска легенда.
=================================================
ЦЕЛИОТ СПОРТСКИ ПОДКАСТ „ПРЕСИНГ“ СО ВЛАДО ИЛИЕВСКИ ГЛЕДАЈТЕ ГО ТУКА…
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
