Шестото коло донесе мали промени на водечките позиции на табелата во Втората лига. Ги услови победата на екипата на Соколи 1933 во дерби-мечот против Ангели кој штипјани го решија во своја корист со резултат (72:68). По шест одиграни кола, штипскиот второлигаш со скор (5-1) е на првата позиција, поточно ја дели заедно со уште две екипи, Црн Дрим и Борец баскет.
И без помошта на своите навивачи во „Нико Нестор“, кошаркарите на Црн Дрим лесно се справија со Академија ФМП. Стружани стигнаа до убедлива победа (90:64), по која остануваат на делба на првата позиција на табелата, сега со ефект (5-1). Од друга страна, ова беше и шести пораз за тимот од Струмица.
Приклучок со самиот врв држи и екипата на Борец баскет. Во ова коло велешани славеа на гостински терен кај Работнички 2018 во Скопје, со сигурни (75:65). До петтиот триумф во шест кола ги предводеше најискусниот, Штерјов, кој реализираше 22 поени, а одлични соработници во фазата на нападот имаше и во Чадамов, кој реализираше 17, и Митрев кој додаде уште 14 поени. Во домашната екипа Шошкиќ постигна 23, а Трајковски уште 11 поени.
Победа, доста важна, извојувана на домашен терен, остварија кошаркарите на Бутел во дуелот со Мега Баскет (84:79), па по шест одиграни кола овие две екипи имаат идентичен скор (3-3). За тоа им беа потребни дополнителни пет минути откако во регуларниот дел резултатот гласеше (72:72). Мартиновски постигна 16 поени, Киров 15, Матевски 14, Кнежевиќ уште 10 за Бутел. Во екипата на Мега баскет, поентерски се издвоија: Јаневски, кој постигна 31.поен, и Настевски кој дојде до 18.поени.
Охрид стигна до изненадувачки, убедлив триумф на гостувањето кај Партизан Водно Санс. На охриѓани им недостасуваше само еден поен да стигнат до „стотката“, славеа со 99:71 за пробив кон горниот дел од табелата. Атанасов запиша 19 поени во гостинската екипа, Пандев имаше 17, Бојовски даде 15, а капитенот Стојаноски уште 12 поени. Кај Партизан Водно Санс, Митев беше реализатор на 17.поени, Бутемер имаше еден помалку, а Башоски уште десет поени.
МЗТ Скопје Уни Банка го совлада составот на Маџари, на крајот и убедливо (86:76). Масевски дојде од 27.поени во победничката екипа, а Величковски постигна 18, а Ангеловски уште 14. поени за„сино-белите“ од Аеродром. На другата страна, Митков реализираше 17 поени, Нацевски 15, а Милков даде 14 поени.
ВТОРА ЛИГА-МАЖИ
РЕЗУЛТАТИ 6.КОЛО
Партизан Водно Санс – Охрид 71:99
Црн Дрим – Академија ФМП 90:64
Бутел – Мега баскет 84:79
Работнички 2018 – Борец баскет 65:75
МЗТ Скопје Уни Банка – Маџари 86:76
Соколи 1933 – Ангели 72:68
ТАБЕЛА: Соколи 1933 11, Борец баскет 11, Црн Дрим 11, Ангели 10, Маџари 9, Мега баскет 9, Охрид 9, Бутел 9, МЗТ Скопје Уни Банка 9, Работнички 2018 7, Партизан Водно Санс 7, Академија ФМП 6;
ИДНО КОЛО (23.11)
Охрид – Работнички 2018, Мега баскет – Црн Дрим, Борец баскет – Бутел, Маџари – Партизан Водно Санс, Академија ФМП – Соколи 1933, Ангели – МЗТ Скопје Уни Банка
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
