Тиквеш и Брегалница ќе ја водат главната битка за пласман во Првата лига низ новата сезона од Втората лига – Исток која стартува денеска од 17 часот.
Кавадарчани со сериозни промени во составот го очекуваат стартот на првенството јасно најавувајќи ја желбата за атак на првото место. Нови имиња во составот на Тиквеш се Благоја Љамчевски и Ристе Рамзовски од Пелистер, Стојан Димовски од Македонија ЃП, офанзивецот Симеон Христов кој пристигна од Влазнија, Албанија, но и Благој Стојанов од Беласица, Далибор Костовски од ФК Септември, Бугарија, Ристе Темелков од Академија Пандев, како и Бобан Здравевски од Осогово.
Брегалница, пак, се засили со досегашните фудбалери на Кит Го, Анџело Николовски, Бојан Ѓорѓиевски и Давид Денковски, како и Кристијан Китановски од Вардар, Илче Петровски од Лабуништа, Андреј Кудијан од Плачковица, Антонио Митрев од Скопје и Сашо Шопоски од Пелистер.
„Реализиравме успешни подготовки и покрај целокупната ситуација со која е зафатен и фудбалот поради пандемијата на коронавирусот. Сега конечно не чека фудбал. По долгата пауза подготвени сме за надигрување, за нас секој натпревар е повеќе од важен и секако со победа сакаме да ја почнеме новата сезона на гостувањето против Саса во Македонска Каменица. Не треба да потсетувам дека минатата година Саса ни одзеде четири бода кои многу не чинеа околу пласманот на табелата, тие беа одлучувачки да не играме во Првата лига“ – вели капитенот на Брегалница, Ристе Наумов, пред денешниот натпревар со Саса.
Тиквеш, пак, гостува на Плачковица која ова лето се засили со Марјан Ташков и Иван Колев од Кит-Го, како и Јовица Радевски кој пристигна од редовите на Кадино.
ВТОРА ЛИГА – ИСТОК (1. КОЛО, денеска, 17 ч.)
Победа – Кит Го
Каменица Саса – Брегалница
Росоман – Слога Виница
Плачковица – Тиквеш
Кожуф – Осогово
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
