Крајно зачудувачка одлука на турскиот Трабзонспор за време на паузата поради репрезентативните активности во националните првенства, кој информираше дека четворица стандардни првотимци се отстранети од првиот тим и префрлени да работат одделно во наредниот период. Меѓу нив и капитенот на македонската репрезентација Енис Барди.
Вистински изненадувачки, ако се знае дека Барди минатиот месец беше еден од најдобрите фудбалери во составот на Трабзон, иако беше очигледно дека, од непознати причини, е во немилост кај тренерот Шенол Ѓунеш.
„Како резултат на денешниот состанок меѓу претседателот Ертугрул Доган, потпретседателот Зејат Кафкас и тренерот Шенол Ѓунеш, одлучено е нашите фудбалери Мислав Оршиќ, Стефано Денсвил, Енис Барди и Умут Бозок да тренираат одвоено за да ги подобрат своите перформанси“ – се вели во соопштението од клубот.
Барди, кој во Трабзонспор е од 2022 година, сезонава забележа вкупно 13 настапи во сите натпреварувања за тимот, од кои осум во турското првенство, два во квалификациите за Конференциската лига и три во квалификациите за Лигата Европа.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
