Ѓоко Зајков е убеден дека секој од македонските репрезентативци ќе го даде максимумот на двата последни натпревари во Лигата на нациите, против Летонија (14 ноември) и против Фарските Острови (17 ноември) во Скопје, како би се дошло до две посакувани победи за крај на успешниот циклус.
Македонија е убедливо прва по четири натпревари, и целта е таму да остане по двете пресметки со што ќе обезбеди место во Б-дивизијата од Лигата на нации следната сезона.
„Се чувствуваме сите навистина одлично, низ една извонредна атмосфера во селекцијата. Добро е што последните два натпревари ги играме пред своите навивачи, па на еден убав начин да дојдеме до две победи кои ќе ни значат многу од повеќе аспекти“ – вели Зајков.
Македонија славеше во Рига убедливо со 0-3 минатиот месец против Летонците.
„Да, победивме на тој натпревар, но треба да се знае дека Летонија е навистина добар противник и одигра одличен меч против нас тогаш. Затоа сега треба да бидеме фокусирани многу повеќе, да дадеме максимум и во одбрана и во напад и уште еднаш да потврдиме дека сме подобар тим. За нас нема разлика дали играме против Италија или против Летонија. Максимално се подготвуваме за секој противник и со иста цел против секого – да победиме“ – вели централниот дефанзивец.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
