Македонскиот репрезентативец Давор Здравковски игра во одлична форма на почетокот од годинава во дресот на шкотскиот Мадервил.
По првичната адаптација по доаѓањето во клубот минатото лето, 25-годишниот Здравковски сега веќе е незаменлив во првиот тим на Мадервил на средината од теренот. Неговиот тим вчера со гол примен во судиското продолжение несреќно загуби од големиот Селтик, уште еднаш потврдувајќи дека е повеќе од сериозен состав во Премиерлигата.
Здравковски сезонава има 12 настапи за Мадервил, посакувајќи да ги достигне фудбалските височини во Шкотска како и неговиот репрезентативен колега Бојан Миовски.
„Искрено сум среќен што играм во едно првенство како шкотското, иако секогаш пред себе имам големи амбиции и никогаш не сум задоволен од себе. Затоа и не планирам да застанам тука, сакам да докажам дека навистина вредам, со напорна работа во мојот тим“ – вели Здравковски во интервју за „Дејли рекорд“, со задоволство прифаќајќи ги констатациите дека тој и Миовски повеќе од успешно го презентираат македонскиот фудбал во Шкотска.
„Го познавам Бојан Миовски од младинските репрезентации на Македонија, имаме одличен однос и пред да дојдам овде, зборував со него во врска со шкотското првенство и шкотскиот фудбал. Тој игра одлично во Абердин и веќе остава силен белег во Шкотска. Секако, сакам и јас да го направам истото. Бојан дефинитивно е позитивен пример за мене“ – дополнува Здравковски.
Давор Здравковски веќе е стандарден со повик и на списокот на селекторот Благоја Милевски на кој се очекува да биде и за престојните пријателски натпревари во март, против Молдавија и против Црна Гора.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
