Резултатската криза на Жалгирис се продлабочи по денешниот нов пораз во Евролигата, петти во низа за литванскиот состав откако во драматична завршница загуби од Барселона со 80-85. Кошаркарите пред една седмица го спасија тренерот Максвитис од отказ, но по двата неуспеси од тој момент (најпрвин на гостински терен со Фенербахче, а потоа и денеска дома со Барса), тешко е да се поверува дека овој стручњак ќе остане на чело на Жалгирис и во новата година.
Денешниот дуел беше преполн со пресврти, во првото полувреме беа постигнати дури 107 поени (51-56), за во вториот дел да падне нивото во напад. Жалгирис имаше 80-77 на повеќе од две минути до крајот, но домаќините не успеаја да постигнат кош до крајот на мечот, а Барса го искористи тоа и стигна до победата. Лапровитола со 18 и Весели со 15 поени беа најефикасни во таборот на Барселона, додека кај Жалгирис потфрли најдобриот кошаркар Кинан Еванс, со 13 поени и шут од поле 4/11, воедно и неколку промашени обиди во клучните моменти од натпреварот.
Басконија ја прекина серијата од два порази во Евролигата откако шпанскиот тим славеше во Истанбул над Анадолу Ефес со 80-87. Клучна беше последната четвртина во која гостите од Шпанија заиграа извонредно во нападот, постигнаа 30 поени вртејќи го резултатот во своја полза и стигнувајќи до победата. Хауард беше најефикасен во победничкиот тим со 28 поени, но најдобар кошаркар на теренот беше Милер Мекинтаер со извонредни 14 поени, 10 асистенции и девет скока. Ларкин со 23 поени и пет асистенции беше единствениот расположен кошаркар за игра во таборот на Ефес.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
