Реал Мадрид ја финишира сезонава во која акцент повторно се става на завршницата од Лигата на шампионите, каде „кралевите“ на финалето против Ливерпул ќе се обидат да стигнат до третата европска круна во серија. Во меѓувреме продолжуваат и шпекулациите околу мега-трансфер на Нејмар на „Сантијаго Бернабеу“ што би можел да се реализира летово, но Зинедин Зидан фокусот го остава врз фудбалерите што ги има на располагање во моментов.
„Нејмар? Можам да кажам дека јас не сум го побарал да дојде во Мадрид, но тоа може и да не значи ништо. Што и да кажам шпекулациите на оваа тема ќе продолжат, затоа настојувам да зборувам што помалку и да се насочам кон тимот што го имам пред себе, да го извлечам најдоброто од него“ – изјави Зидан.
Тренерот на Реал Мадрид сепак им одговори на оние кои тврдат дека Нејмар и Роналдо се преголеми ѕвезди за да можат да играат заедно во ист тим.
„Зошто не би играле заедно, оние најголеми играчи се толку врвни бидејќи можат да играат крај секого, и тимот да биде уште подобар. Па и за мене велеа дека не можам да играм во ист тим со Џоркаеф, па заедно станавме светски шампиони“ – прокоментира легендарниот Французин.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
