Златан Ибрахимовиќ се врати назад во Италија, каде врз голгетерот на Милан беа извршени нови детални прегледи по повредата заработена на тренингот на „росонерите“ на 25 мај. Добра вест е што дефинитивно не станува збор за проблем со тетивата, а рехабилитацијата на повредениот мускул на ногата оди според планот. Сепак, повредата не е нималку наивна, па се очекува Ибракадабра да отсуствува од терените уште околу еден месец.
Весникот „Тутоспорт“ тврди дека лекарска препорака е пауза од триесетина дена, што би значело дека „росонерите“ нема да можат да сметаат на својот најдобар напаѓач на реваншот од Купот на Италија против Јувентус на 13 јуни, како и на четири средби од Калчо-лигата, против Лече, Рома, СПАЛ и Лацио. Доколку се биде во најдобар ред, Ибракадабра би се вратил на терените на големото дерби против Јувентус закажано за 7 јули, тврди „Тутоспорт“.
Ибрахимовиќ има договор со Милан до крајот на сезонава и речиси сигурно нема да ја продолжи верноста кон „росонерите“. Најсериозен интерес за неговите услуги покажаа калчолигашот Болоња и шведскиот прволигаш Хамарби, каде Ибракадабра стана косопственик купувајќи дел од акциите на клубот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
