Ричмонд Боачи го постигна водечкиот гол за Црвена Звезда на синоќешниот дуел со Хелсинки, што беше десетти погодок што голгетерот од Гана го постигна на европските натпревари на „црвено-белите“. Со ова одличниот напаѓач се израмни со поранешниот македонски репрезентативец, Бошко Ѓуровски, кој е еден од ретките со двоцифрен број на погодоци на европските средби на Црвена Звезда.
Покрај Ѓуровски и Боачи, десет гола зад своето име има и Милош Шестиќ, а само за споредба, Дејан Савичевиќ ја заврши својата „црвено-бела кариера“ со девет европски погодоци зад своето име. Интернационалецот од Гана сега го брка остварувањето на легендарниот Македонец, Дарко Панчев, кој постигна 14 погодоци на европските натпревари во црвено-белиот дрес.
Најдобар европски стрелец во историјата на Црвена Звезда е Зоран Филиповиќ со 28 гола, на делба на второто место се Бора Костиќ и Душан Савиќ со по 20 погодоци, а пред Панчев е уште и Никола Жигиќ, кој своевремено постигна 17 погодоци на натпреварите од европските купови на „црвено-белите“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
