Ракометарите на Данска ќе се спротивстават на Германија во големото финале на ОИ во Париз откако избраниците на Николај Јакобсен славеа во вечерашното полуфинале против Словенија со резултат 31-30. Словенците беа најпријатно изненадување на овој турнир, но ракометарите на селекторот Урош Зорман немаа сили за нов подвиг, предоцна се разбудија и не можеа да стигнат до израмнување во самиот финиш.
Скандинавската селекција фуриозно го отвори мечот со 0-3, а се што успеаја Словенците беше намалување на предноста на еден гол во неколку ситуации во првото полувреме. Сепак, Данска беше селекцијата што повторно доминираше пред крајот на полувремето и на одмор замина со убедливи 10-15. Избраниците на Зорман на стартот од вториот дел намалија на 16-19, но Данска повторно имаше одговор, не дозволувајќи долго разликата да се спушти под три гола.
Словенија конечно спушти на „минус два“ кога Мачковшек погоди за 29-31 на четири минути до крајот. Данска влезе во криза во нападот, а Јанц реализираше за 30-31 на една минута до крајот. Јакобсен побара тајмаут пред последниот дански напад, „црвено-белите“ најпрвин ја испуштија топката, но Гидсел ја прифати и успеа да изнуди пенал. Ферлин го запре обидот на Хансен од седум метри, Словенија тргна во последен напад, Влах беше фаулиран, а судиите и по ВАР-проверката не доделија пенал, туку девет метри. Мачковшек се обиде преку живиот ѕид, но шутираше и над гредата, по што Данска и дефинитивно со минимални 30-31 се пласираше во големото финале.
Гидсел беше запрен на четири гола, а најефикасен кај Данска беше Магнус Ландин со шест погодоци, пред Хансен со пет. Кај Словенија одлични беа Влах и Бомбач со по седум погодоци, голманот Ферлин имаше 11 успешни интервенции, но и тоа не беше доволно за да се земе скалпот на големиот фаворит.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
