Египетскиот фудбалер Мохамед Салах изјави дека верува оти може да игра до 40 години и дека сè уште разговара со клубови од Саудиска Арабија за евентуален трансфер откако ќе му истече договорот со Ливерпул, објави Би-Би-Си.
Напаѓачот на Ливерпул, кој неодамна наполни 32 години, имаше добра сезона во која постигна 29 гола и запиша 18 асистенции, во годината во која Ливерпул ја освои титулата во Премиерлигата.
Според Би-Би-Си, минатата година Салах беше на работ да се пресели во Саудиска Арабија, каде што ќе заработи најмалку 500 милиони фунти, но во последен момент одлучи да го продолжи договорот со Ливерпул.
„Ќе престанам да играм кога ќе почувствувам дека е време. Ако ме прашате за мое мислење, мислам дека можам да играм до 39 или 40 години, но ако почувствувам дека сакам да престанам пред тоа, ќе престанам. Веќе постигнав многу“ – изјави Салах за египетската телевизија „ОН Спортс“.
„Мојот договор истече во Ливерпул и имаше можност да одам во Саудиска Арабија, но сепак финализиравме нов договор со мојот тим“ – дополни Египќанецот.
Салах досега постигна 186 гола во Премиерлигата, што моментално го става на петтото место на листата на најдобрите стрелци на сите времиња, само еден гол зад легендарниот Енди Кол.
Египетскиот репрезентативец откри дека сè уште е во контакт со саудиските клубови и дека ја остава отворена можноста да оди во таа лига по истекот на неговиот тековен договор во 2027 година.
„Имам добри односи со луѓето од Саудиска Арабија и остануваме во контакт. Да, разговаравме. Не знам што ќе се случи во иднина, но сега сум среќен во Ливерпул и ќе останам тука уште две години. После тоа ќе видам што ќе се случи понатаму“ – вели Салах.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
