Баерн Минхен повторно покажа интерес за крилниот напаѓач на ПСЖ, Бредли Баркола. Спортскиот директор Макс Еберл веќе се распрашал за можноста за трансфер, но одговорот од Париз наводно бил разочарувачки.
ПСЖ бара обештетување до 90 милиони евра за својот играч, износ што германскиот шампион не може или не сака да го плати. Баерн и неколку други европски гиганти беа заинтересирани за Баркола и минатото лето, но потоа ПСЖ ја одби продажбата, а Баварците се свртеа кон Луис Дијаз, кого го доведоа од Ливерпул за 70 милиони евра, што се покажа како одличен потег.
Незадоволство во Париз и потрагата по напаѓачот
И покрај успешниот трансфер на Дијаз, извештаите сугерираат дека клубот од Минхен сè уште бара разновиден напаѓач. Од друга страна, 23-годишниот Баркола наводно е многу незадоволен од својата улога во Париз, каде што најчесто доаѓа од клупата.
Ова се виде и во полуфиналето од Лигата на шампионите против Баерн, каде во двата натпревари доби шанса само на крајот. Иако неговиот договор е важечки до 2028 година, па ПСЖ не е под притисок да го продаде, упорноста на играчот би можела да ја промени ситуацијата. Се вели дека пред неколку месеци тој го одбил понуденото продолжување на договорот.
Во контекст на потрагата по засилувања, Баерн е силно активен и по крилниот напаѓач на Њукасл, Ентони Гордон, кој наводно сака да го напушти Сент Џејмс Парк и би можел да се вклопи во нападот зад Хари Кејн.
Сепак, цел број еден за Баварците е Јан Диоманде од РБ Лајпциг. Што се однесува до Баркола, Баерн не е единствениот заинтересиран. „Скај“ наведува дека го следат неколку врвни клубови и дека неговите агенти веќе се во преговори со Барселона, Ливерпул и Арсенал. Арсенал наводно е најзагреан да го доведе.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
