Шпанскиот фудбалски селектор Луис Енрике очекува голема борба со Хрватска на средина од теренот, па потенцираше дека верува во својот тим. Енрике изјави дека Шпанија може да дојде до победа и на тој начин да се доближи до посакуваното финале на ЕП.
„Црвената фурија“ овојпат за противник ќе ја има силната Хрватска предводена од Лука Модриќ, а овој меч ќе биде одигран во рамки на осминафиналето на Европското првенство во Копенхаген.
„Лука Модриќ и Матео Ковачиќ се најдобрите играчи во Хрватска. Секој го познава Модриќ, направи фантастични работи со Реал Мадрид, тој е важен во хрватскиот тим. Ние добро се познаваме. Ќе има голема борба на средината од теренот. Верувам во мојот тим, исто како и на почетокот на турнирот. Мислам дека Шпанија има одличен тим за пласман во големото финале“, истакна Енрике.
Алваро Мората откри дека тој и неговото семејство добиле заканувачки пораки за време на шампионатот, па новинарите се интересираа за мислење од тренерот на селекцијата на Шпанија за оваа тема.
„Ситуацијата е сериозна, полицијата треба да се справи со тоа. Не е важно што имам да кажам за тоа, проблемот треба да се реши што е можно побрзо. Тоа е кривична постапка“, рече Енрике.
Дуелот помеѓу Шпанија и Хрватска е закажан на програмата денес со почеток од 18 часот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
