Новак Ѓоковиќ уште еднаш потврди дека е тенисерот во убедливо најдобра форма во моментов откако без многу мака го реши Кевин Андерсон за пласман во големото финале од АТП-шампионатот.
Ѓоковиќ покажа како се оправдува фаворитска улога, откако попладнево тоа не му успеа на Роџер Федерер, па од самиот почеток јасно му стави до знаење на Андерсон „кој е кој во светскиот тенис“, доминирајќи од првиот до последниот гејм во вечерашното полуфинале.
Мечот почна со брејк на самиот старт, по што Ѓоковиќ уште еднаш го освои сервисот на противникот и го доби првиот сет со 6-2. Вториот сет почна идентично, со брејк на Србинот, по што Новак рутински триумфираше со идентични 6-2.
Новак Ѓоковиќ утре во големото финале ќе се сретне со Александар Зверев, кого пред неколку дена во групната фаза од овој турнир го совлада со 2-0 во сетови.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
