Селекторот на француската фудбалска репрезентација, Дидие Дешамп вели дека поранешните добри игри на Антоан Гризман не му гарантираат дека има сигурно место во стартниот тим на „триколорите“. Гризман откако е во Барселона се обидува да ја најде вистинската форма, но се чини дека е далеку од игрите кои ги прикажуваше во периодот од 2016 до 2018 година.
„Гризман е надвор од натпреварувачки ритам, а вие добро знаете зошто е тоа така. Потребно му е време. Против Португалија беше многу подобар во второто полувреме. Гризман е напаѓач, но тоа што се движи низ целиот терен го прави многу важен за нашиот тим“, изјави Дешамп.
Гризман во 2016 година на Европското првенство во Франција беше одбран за најдобар фудбалер, а две години подоцна со националниот тим го освои Мундијалот во Русија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
