Садио Мане изненади многумина со одлуката да си замине од Ливерпул, од неколкуте понуди на маса прифаќајќи ја онаа за трансфер во Баерн Минхен. Сенегалецот е убеден дека го донел вистинскиот избор бидејќи Баерн игра одличен фудбалер, а Бундес-лигата се докажа како апсолутно израмнето натпреварување.
„За мене нема дилема, Баерн беше вистинскиот избор. Многумина се сомневаа, но Бундес-лигата не е многу послаба од Премиер-лигата. Израмнета е, само погледнете ја табелата, атмосферата на стадионите е фантастична. Трансферот од Ливерпул во Баерн ми е чекор напред во кариерата. Убеден сум дека во иднина уште многу асови од Премиер-лигата ќе доаѓаат во Германија“, изјави Мане.
Воедно, тој откри и дека имал случајна средба со Кристијано Роналдо, од кого добил поддршка за реализираниот трансфер.
„Бев на одмор во Мајорка и таму се сретнав со Кристијано Роналдо. Се поздравивме и првото што ми го рече беше дека не сум згрешил што заминав од Ливерпул во Баерн, туку напротив тоа е вистински чекор за мојата кариера“, обелодени поранешниот ас на „црвените“.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА