ВТОРА ЛИГА: Започнува походот кон „елитата“

Со десет натпревари во првото коло денеска започнува Втората лига во кошаркарска Македонија, во која 20 екипи поделени во две групи, Исток и Запад, ќе се обидат да стигнат до посакуваната цел – промоција во Првата лига.

Во групата „Исток“ силите ќе си ги одмерат екипите на: Ангели, Баскет КАМ, Борец Баскет, Куманово 2, МКК Куманово, Пробаскет, Ролинг 08, Струмица, Феникс 2010 и Шкупи. Додека пак го групата „Запад“ ќе се сретнат: ГКК Охрид, Мега Баскет, Партизан Водно Санс, Пелистер Медика карта, Риниа, Спарта, Спорт Тим, Тетекс ТТК, Хераклеа и Чаир 2030.

Во регуларниот дел од сезоната во двете групи ќе бидат одиграни по 18 кола, по кое следи разигрување во четвртфиналето кое ќе се игра во два добиени натпревари според системот (и1-з4, и2-з3, и3-з2, и4-з1), од кои првиот се игра на теренот на подобро пласираната екипа. Победниците од овие дуели ќе имаат во полуфиналето, кое ќе се игра повторно на две добиени средби кои ќе значат пласман во финалето и промоција во Првата лига.

Денеска ќе бидат одиграни четири средби од кои три во групата „Запад“ и една во групата „Исток“, а силите ќе си ги одмерат Хералеа и Спарта, Тетекс ТТК и Спорт Тим, Риниа и Охрид (Запад), и Пробаскет и Шкупи (Исток), додека пак во текот на утрешниот ден ќе се сретнат Партизан Водно Санс и Чаир 2030, и Мега Баскет и Пелистер Медика карта (Запад), како и Куманово 2 и Ролинг, Струмица и Феникс 2010, Ангели и Баскет Кам, како и Борец Баскет и МКК Куманово (Исток).

Екипите се подготвени, а дуелите може да започнат!