Алкалоид со максимални 6-0 славеше против швајцарската екипа Цирих Шахгезелшафт во 5. коло на Европскиот клупски куп на шампионите во шах.
Ова е највисоката победа на „фармацевтите“ во досегашниот тек од натпреварите, победувајќи на сите шест поединечни табли.
Мамедјаров повторно демонстрираше висока класа и ја искористи малку пасивната игра на својот противник за да освои цел поен. Андреикин успеа да ја прекине серијата реми, овој пат не ја испушти остварената предност, а со тоа и цел поен. Најбрзите победи во мечот ги постигнаа Шанкланд и Криворучко. Ковалев ја оствари четвртата победа на турнирот, и на крајот Инаркиев го оформи конечниот резултат во мечот 6-0.
По петтото коло, во водство е екипата на Обиетиво од Падова, Италија со максимални 10 бодови од пет меча. Ја следат Медњи Всадник од Санкт Петербург, Русија и ШК Лиза и Лабем од Чешка со по еден бод помалку. Алкалоид моментално е на делба од 4. до 10. место со 8 бода.
Во шестото коло, ШК Алкалоид ќе игра против чешкиот ШК Лиза и Лабем. Во дербито на колото италијанскиот Обиетиво ќе игра против Медњи Всадник.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА