Британскиот атлетичар Џермејн Мејсон рано утрово го загуби животот во сообраќајна несреќа во Кингстон, Јамајка, откако излетал од патот возејќи го својот мотор. Медиумите од Јамајка јавуваат дека тој се наоѓал во друштво на најбрзиот човек на светот, Усаин Болт, со кого заедно биле на забава во еден ноќен клуб. Болт, Мејсон и останатите од друштвото направиле конвој од мотори и се упатиле кон своите домови, но веднаш потоа дошло до трагичниот настан, 34-годишниот Мејсон ја загубил контролата, излетал од улицата, а по патот починал на лице место.
Болт и јамајканскиот спринтер Мајкл Фрејтер биле меѓу првите кои стигнале на местото на несреќата, но не можеле да сторат ништо за да го спасат својот пријател.
„Најискрено сочувство за целото спортско братство и до најблиското семејство на Џермејн Мејсон“ – порача Премиерот на Јамајка, Ендрју Холнес.
Мејсон, кој имаше успешна кариера во дисциплината скок во височина, е роден во Јамајка, но подоцна во кариерата реши да настапува за селекцијата на Велика Британија. Негов најголем успех беше освоениот сребрен олимписки медал на ОИ во Пекинг во 2006 година.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
