На 64-годишна возраст почина Драган Василов – Цевка, еден од најпознатите македонски кошаркарски тренери за млади категории.
Популарниот Цевка повеќе од три децении, со мали прекини, работеше како тренер на млади играчи. Низ неговите раце поминаа бројни познати кошаркари и македонски репрезентативци, пред сè од школата на Работнички, како Перо Антиќ, Емил Рајковиќ, Ѓорѓи Чековски, Александар Јончевски, а во младинските селекции и Димитар Мираковски, Златко Гоцевски, Александар Антиќ, Кирил Павловски…
Во 1999 година беше селектор на кадетската репрезентација на Македонија која го освои шестото место на Европското првенство во Словенија што досега е втор најдобар пласман на една македонската младинска селекција, по четвртото место во 1995 година.
По заминувањето од Работнички, работеше во уште неколку клубови како Торус СЦБТ, Партизан Водно Санс, Јуниор и Феникс 2010.
Смртта го затекна како претседател на Тренерската комисија при Кошаркарската федерација и еден од лидерите на младинскиот камп кој се одржуваше во Маврово, во ко-организација на КФСМ и ФИБА. Токму во Маврово заврши и неочекувано животниот пат на Василов откако го одработил еден од тренинзите во текот на вчерашниот ден на тренинг-кампот за младите категории во организација на КФСМ и ФИБА.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
