Само две кола, од се уште есенскиот дел од првенството на Втората фудбалска лига на Македонија, траеше љубовта меѓу Вардарски и тренерот Ставре Ташев. По 43 одржани тренинзи, комплетирање на „ растурената екипа“, по почетните два порази од Скопје 0:2 и Кожув 0:1, еден од легендите на гевгелискиот фудбал си поднесе оставка пред саботниот меч со Детонит Плачковица.
– Дојдов со голема желба да му помогнам на Вардарски, да се спаси по катастрофалните есенски резултати, кога беа освоени само 5 бода, но и покрај сите мои напори, благодарејќи на некои луѓе кои му останаа верни на клубот, тешко одеше. Немаше квалитетни играчи, имаше и некои недоразбирања во клубот и затоа донесов одлука да си заминам, ни рече Ташев, кој на кормилото на Вардарски дојде по Васе Беќаров, Ѓоре Јовановски и Трајче Ников.
Саботниот меч на Вардарски со Детонит Плачковица (1:4) го водеше новиот, на брзина избран тренер Бојан Захариев од Скопје. Едно време беше и претседател на Вардар од Скопје во неговите најтешки денови кога се бореше дури и за својот опстанок на фудбалската сцена, кога ги менуваше претседателите како на филмска лента. Захариев работеше и во неколку други клубови, меѓу кои и Беласица, Брегалница…
Во првиот дел од првенството, на клупата на Вардарски, од стартот до сега, седеа дури пет тренери што јасно покажува за хаотична ситуација во клубот. Затоа е и последен на табелата, со се уште тие 5 првични бода, кои не носат ништо добро во продолжението на првенството на Втората лига. Меѓутоа, што е интересно, се уште има надежи за Вардарски да игра барем бараж за опстанок, бидејки Борец има 7, Осогово 10 бода (другите со 20 бода се далеку пред нив) и се уште има да се игра до крајот. Но, за тоа да се оствари треба да се сменат многу работи во клубот, не само да се менуваат тренерите.
М.М.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
