Домаќинот Данска ќе ги одмери силите со Германија во неделното големо финале од ЕП 2026 откако Данците вечерва во второто полуфинале ја совладаа селекцијата на Исланд со 31-28. Исланѓаните долго време одлично му парираа на големиот фаворит, но Данците сепак најдоа начин во второто полувреме да се одлепат и да стигнат до билет за големото финале.
Првото полувреме мина во целосно израмнета игра, Исланд го искористи периодот со двајца играчи повеќе и набрзина поведе со 3-6, но само неколку минути подоцна „црвено-белите“ успеаја да се вратат и да го израмнат резултатот. Исландските бекови играа беспрекорно „еден на еден“ и им создадоа огромни главоболки на олимписките шампиони, но Данците сепак заминаа на одмор со минимално водство од 14-13. Исланѓаните имаа минимална предност и на стартот од вториот дел, но загубија здив во последните дваесетина минути.
Одбранетиот пенал на Кевин Мелер им даде дополнителен импулс на Данците, кои додадоа гас, заиграа уште поквалитетно и си го трасираа патот до финалето.
Голманите немаа свој ден, Нилсен имаше само четири, а Мелер две интервенции за Данска, додека Халгримсон одбрани вкупно шест удари на голот на Исланд. Во нападот на Данците најефикасен очекувано беше Гидсел со седум, пред Хансен со шест и Питлик со пет погодоци, додека прв стрелец на исландскиот состав беше Смарасон со осум погодоци.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
