Барселона за малку не успеа да ја исполни „невозможната мисија“ во полуфиналето од Копа дел реј, во кое каталонците бркаа четири гола негатива од првиот меч со Атлетико, а синоќешниот реванш го добија „само“ со 3-0.
Покрај елиминацијата од ова натпреварување, уште поголем проблем за тренерот Флик се повредите на двајцата бекови, Жил Кунде и Алехандро Балде. Кунде беше стартер на десната бековска позиција, но по десетина минути игра се пожали на повреда на мускулот и мораше да биде заменет, при што во игра влезе токму Балде.
Сепак, ниту овој играч не го доврши мечот откако самиот заработи нова повреда на мускулот и мораше да биде заменет во второто полувреме.
Деталните лекарски прегледи извршени денеска покажаа дека повредите не се нималку наивни и двајцаа дефанзивци сигурно ќе отсуствуваат до крајот на месец март.
Ова значи дека Балде и Кунде нема да настапат на претстојниот двомеч од осминафиналето на ЛШ со Њукасл, а ќе пропуштат и низа важни средби во Ла Лига, против екипите на Атлетик Билбао, Севилја и Рајо Валјекано.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
