Во насока на засилена промоција на фудбалската игра на домашната сцена, ЕКИПА со избор на најдобрите од секоја рунда натпревари од ПМФЛ. Покрај тимот на колото и најдобриот играч, ќе се обидеме да ви ги доближиме и сите најинтересни моменти од секое коло, низ една рекапитулација на настаните.
ТИМ НА 23. КОЛО
Сигурно дека Шкупи не е никаков репер, но трите гола на Лусианињо го ставаат како најдобар играч на ова коло. Дилемата беше дали тој или Стефан Јевтоски од Струга ТЛ (гол и асистенција против Македонија ЃП), но три гола се три гола, па макар биле и против отпишаниот тим од Чаир.
Вардар и Шкендија ја продолжуваат „мртвата трка“ за титулата. Двата тима славеа минимално со по 1-0 над АП Брера, односно против Арсими. Важеа за големи фаворити, а на крајот се намачија да дојдат до трите бода.
Особено ова важи за Вардар кој дури во судиското надополнување успеа да го скрши отпорот на АП Брера, и тоа со гол од пенал. Во Тетово, пак, Шкендија беше подобра од Арсими благодарение на прекрасниот гол на ветеранот Бесарт Ибраими.
Струга ТЛ со 3-0 ја совлада Македонија ЃП и стави „печат“ на третото место, додека Силекс дополнително заостанува по ремито без голови против Пелистер на свој терен. Едноставно теренот во Кратово како да е гостински за Силекс, кој нема победа оваа година пред своите навивачи.
Работнички е тимот кој најмногу профитираше ова коло. „Романтичарите“ триумфираа во Куманово на гостувањето кај Башкими со 1-2, и така ги оживеаја шансите за некаков опстанок. А, тоа е можно само доколку тимот од Дебар Маало бележи само добри резултати, а и нивните ривали Пелистер, Македонија ЃП, па и Арсими да кикснуваат. Сега разликата од Пелистер е само три бода, од Македонија ЃП четири бода, со што опстанокот станува возможна мисија за избраниците на Муарем Муарем, кој го заработува епитетот „тренер на колото“.
====================================
ИГРАЧ НА КОЛОТО: Лусиано Ајрес Бучар Лусианињо (Тиквеш)
Три гола во дуелот против Шкупи за убедлив триумф на Тиквеш, кој оди кон помирни води и кон директниот опстанок во Првата лига. Едноставно, овој играч кој може да игра и во средината и на крилните позиции и во нападот блескаше против последнопласираниот тим на табелата.
================================
ТРЕНЕР НА КОЛОТО: Муарем Муарем (Работнички)
Се чини дека полн погодок беше назначувањето на Муарем Муарем за тренер на Работнички. Неговиот тим славеше против неговиот доскорашен клуб, и ги оживеа надежите дека може да дојде до опстанок. Можеби тоа нема да биде директен, но се освен испаѓање е „џек-пот“ за овој тим, со оглед дека беше целосно отпишан од трката на стартот од пролетниот дел.
==============================
ГОЛ НА КОЛОТО: Бесарт Ибраими (Шкендија)
Прекрасен гол постигна ветеранот во ПМФЛ, Бесарт Ибраими. Играчот на Шкендија откако мина неколку противнички играчи, успеа со силен удар да го совлада голманот на Арсими, и така неговиот тим да ја продолжи битката за титулата.
ЛИСТА НА СТРЕЛЦИ ПОСЛЕ 23. КОЛО:
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
