Се огласи и Јамал: „Оваа повреда боли повеќе од тоа што може да опишам“

Ламине Јамал не може да се помири со повредата на тетивата која ја заработи вчера против Селта на „Камп Ноу“.

Поради повредата, неговата сезона во Барселона е завршена, но тој треба да се опорави на време за настапот со шпанската репрезентација на Светското првенство.

По вчерашната повреда, се огласи и самиот Јамал кој преку социјалните мрежи ги сподели своите чувства…

„Поради оваа повреда, морам да направам пауза токму во моментот кога најмногу сакав да бидам на теренот и тоа боли повеќе отколку што можам да опишам. Ме боли што не можам да се борам со моите соиграчи и да му помогнам на тимот кога им требам најмногу. Но, верувам во нив и знам дека ќе ја остават својата душа на секој натпревар. Ќе бидам со нив, дури и надвор од теренот, ќе ги бодрам и ќе ги туркам како еден од нив. Ова не е крај, само пауза. Ќе се вратам посилен, со поголема желба од кога било, и следната сезона ќе биде подобра. Ви благодарам за вашите пораки и поддршка“, напиша Ламине.

Силна поддршка од соиграчите

Неговата објава веднаш предизвика илјадници реакции, а соиграчите беа меѓу првите што одговорија. Фермин Лопез, Марк Бернал, Феран Торес и Марк Касадо се само дел од играчите кои јавно му упатија зборови на охрабрување.

Играчите ја покажаа својата поддршка за него уште вчера во соблекувалната, како и на теренот веднаш откако се струполи по пеналот што и донесе три бода на Барселона против Селта. Тој се повреди токму при изведување на ударот.

Голем удар за Барса на крајот од сезоната

Осумнаесетгодишниот Ламине е клучен играч во системот на тренерот Ханси Флик, кој ќе мора да го преуреди тимот за преостанатите шест натпревари во Ла Лига. Барселона е на еден чекор од обезбедување на титулата во лигата, но ќе мора да ја заврши работата без својот млад ас.

Каталонскиот тим е девет бода пред Реал Мадрид, а Ел Класико е закажано за 10 мај на „ Камп Ноу“. Сепак, крилниот напаѓач ќе биде подготвен за Светското првенство.