Менаџерот на Астон Вила, Унаи Емери, порача дека неговиот тим има амбиција да продолжи да напредува и да освојува трофеи, откако минатата сезона стави крај на 30-годишното чекање на клубот за голем трофеј.
Астон Вила во мај го совлада Фрајбург со 3-0 во финалето на Лигата на Европа, со што Емери ја освои рекордната петта титула во ова натпреварување. За клубот од Бирмингем тоа беше прв голем трофеј по Лига купот во 1996 година.
Триумфот во Лигата на Европа беше и првиот европски трофеј на Вила по Европскиот куп во 1982 година, кога англискиот клуб го победи Баерн Минхен во финалето.
Сега пред Емери и неговите фудбалери е нов голем предизвик – дуелот со европскиот шампион Пари Сен Жермен во Суперкупот на УЕФА во Салцбург.
„Веќе четири години сум во Астон Вила. Задоволен сум од тоа како реагираат играчите. Играчите нè следат и почитуваат сè што се обидуваме да воведеме како стандарди. Сакаме да изградиме свој менталитет. Благодарни сме на играчите. Но, сакаме повеќе. Нема да застанеме тука“, изјави Емери.
Шпанскиот стратег сè уште ја брка својата прва титула во Суперкупот, откако претходно трипати не успеа да го освои ова натпреварување.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
