Фудбалскиот свет е изненаден од веста која пристигна од Турција доцна синоќа. Според локалниот новинар Јакуп Џинар, египетската ѕвезда Мохамед Салах постигнал двегодишен договор со Трабзонспор, а официјалната потврда за трансферот треба да следи утре на 2 август.
Според извештаите, Салах треба да заработува околу 15 милиони евра годишно во Трабзонспор, со дополнителни бонуси.
Доколку оваа информација се покаже како точна, тоа би бил еден од најголемите трансфери во историјата на турскиот фудбал.
Во последните недели, Салах беше поврзуван со бројни клубови по напуштањето на Ливерпул, а Бешикташ беше споменуван меѓу најсериозните кандидати.
Сепак, според истите извори, токму Трабзонспор успеа да го убеди Египќанецот да ја продолжи кариерата на брегот на Црното Море.
Сепак, набргу откако се појави оваа информација, за навивачите на Трабзонспор пристигна студен туш. Претседателот на клубот, Ертугрул Доган, ги негираше наводите за постигнатиот договор со Салах.
„Уште колку пати треба да ги негирам овие тврдења? Немаме таков план“, рече Доган во изјава за турските медиуми, јасно отфрлајќи ги гласините што ги преплавија социјалните мрежи.
Затоа, целата приказна засега мора да се сфати со резерва. Иако Јакуп Џинар е познат по информациите од турскиот фудбал, засега нема официјална потврда од Мохамед Салах, неговите претставници или Трабзонспор.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
