Јапонската тениска ѕвезда, Наоми Осака стана најплатената спортистка воопшто надминувајќи ја американската ривалка, Серена Вилијамс. На само 22 години, Осака која има две Грен-слем титули во кариерата според магазинот „Форбс“ за 12 месеци заработила над 34 милиони евра од награди од турнири и со спонзорски и од маркетиншки договори. Сумата што ја заработи Осака е за 1, 3 милиони евра повеќе од заработувачката на Вилијамс.
Во последните 12 месеци за кога е правена пресметката и двете тенисерки го урнаа рекодрот од 2015 година од 26 милиони евра кој и припаѓаше на Марија Шарапова. Од како од 1990 година, „Форбс“ ја прави листата на најбогати спортистки, секогаш на врвот биле тенисерки. Осака годинава е на 19. место на вкупната листа на магазинот за најбогати спортисти во светот, четири позиции подобропласирана од Вилијамс. Серена беше на врвот на оваа листа во претходните четири години, а пред неа пет години по ред владееше Шарапова.
Наоми Осака поради огромната популарност во Јапонија е исклучително привлечна за компаниите и брендовите од оваа земја, но и од целиот свет. Таа е заштитно лице на Олимписките игри во Токио кои ќе се одржат следната година и тоа и помогна да направи вносни договори со глобални брендови како „Nike“, „Nissan“ ,„Yonex“ и многу други.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
