Разговорот со лекар за уролошки проблеми може да почне со едноставен опис на тоа што си го забележал. Почесто стануваш ноќе за да мокриш? Млазот ти е послаб од порано или тешкотиите со ерекцијата се повторуваат? На преглед спомни кога почнала промената и дали ти влијае врз сонот или секојдневието. По повод Movember, dm drogerie markt го отвора разговорот за машкото здравје со ноемвриски активности под пораката „Чувај го она што е важно“.
Краток дневник од неколку дена може да ти помогне да ги опишеш промените во мокрењето. Запиши колку често мокриш преку ден, колку пати стануваш ноќе и кога и колку течности пиеш. На преглед спомни и што си забележал при мокрењето, како тешкотии на почетокот, послаб или испрекинат млаз, печење, болка или чувство дека мочниот меур не се испразнил целосно.
За болката во долниот дел на стомакот или во карлицата, кажи каде точно ја чувствуваш, кога се јавува и колку трае. Спомни и дали чувствуваш болка при или по ејакулација. Тешкотиите со ерекцијата што се повторуваат можеш да ги опишеш преку тоа кога почнале и колку често се јавуваат. Кажи дали ти е тешко да постигнеш ерекција, да ја одржиш или и двете. Спомни и дали во тој период ти била сменета терапијата.
Нова грутка, оток или промена во големината или обликот на тестисот се причина да закажеш преглед, дури и кога промената е безболна. Кажи кога првпат си ја забележал и дали оттогаш се менувала. Болно или зачестено мокрење придружено со покачена температура или треска бара лекарска проценка без одложување. Побарај итна медицинска помош при ненадејна силна болка во тестисот или кога воопшто не можеш да мокриш.
Првиот преглед кај уролог обично почнува со разговор за симптомите и за твоето здравје. Понеси ги претходните резултати ако ги имаш, како и список на лековите и додатоците во исхраната што ги земаш. Во зависност од симптомите, урологот може да предложи физички преглед, анализа на урина или крвни испитувања.
Едно од крвните испитувања што урологот може да ги предложи е ПСА-тестот. Со него се мери нивото на ПСА, односно простата-специфичен антиген, белковина што ја создава простатата. За анализата се зема мала количина крв од вена на раката, а земањето на примерокот обично трае неколку минути.
При закажувањето побарај упатства за подготовка, вклучително и дали треба да дојдеш на гладно. Лекарот или лабораторијата може да ти препорачаат во текот на 48 часа пред земањето крв да избегнуваш ејакулација, возење велосипед и интензивно вежбање, бидејќи овие активности можат привремено да влијаат врз вредноста на ПСА.
Лекарот го разгледува резултатот заедно со симптомите, наодот од прегледот и претходните вредности на ПСА, ако ги имаш. Прашај кога ќе го добиеш резултатот и со кого можеш да разговараш за неговото значење.
Со оваа едукативна содржина, dm ги охрабрува мажите да разговараат со лекар за промените што ги забележуваат. На преглед можеш да кажеш и сосема едноставно – „Забележав промена и сакам да ја проверам.“
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
