Сејдини: Милевски е човекот кој го регенерираше мак-фудбалот, трендот мора да продолжи

Македонската фудбалска репрезентација денеска и официјално доби нов предводник откако Благоја Милевски беше назначен за селектор на националниот тим. „Сер Боби“ е творецот на златната генерација на македонски фудбалери кои за прв пат згазија на европското првенство во 2017 година во Полска па ова е сосема очекуван избор од ФФМ.

Првиот човек на македонскиот фудбал, Мухамед Сејдини му се заблагодари на доскорешниот селектор Игор Ангеловски кој ќе биде запишан како прв тренер кој ја одвел А-репрезентацијата во ЕП, и го посочи Милевски како личноста со извонредни тренерски квалитети која го регенерирала македонскиот фудбал.

„Најпрвин, од мое лично и од име на Управниот одбор на Фудбалската федерација на Македонија упатувам благодарност до Игор Ангеловски за неговата работа и придонесот кој го даде за успесите со македонската А репрезентација. Игор Ангеловски самиот најави дека по завршувањето на Европското првенство ќе бара нови предизвици во својата кариера и сега е време ние да ја почитуваме неговата одлука и да ја  покажеме нашата благодарност за неговата работа и страст во сите овие години на чело на македонската А репрезентација.

Визијата за нашата фудбалска иднина со Благоја Милевски на местото селектор на македонската А репрезентација е кристално јасна. Тој е човекот кој го регенерираше македонскиот фудбалски крвоток, создаде неверојатна група на фудбалери кои зад себе веќе имаат настап на две Европски првенства, младинско и сениорско и уверени сме дека тој пат мора да продолжи.

Му даваме доверба на Благоја Милевски да ја предводи македонската А репрезентација поради неговиот карактер, работната етика и човечките квалитети. Тој е тренер кој става личен печат на тимовите кои ги предводи и човек со дисциплина и исклучителна ментална сила. Македонската А репрезентација ќе ја предводи селекторот Благоја Милевски кој ја создаде златната генерација македонски фудбалери која беше меѓу 12-те најдобри селекции во Европа и фудбалери кои веќе неколку години се дел од нашиот најдобар национален тим.

Веруваме во квалитетите на Благоја Милевски и убедени сме дека ќе продолжи со успех да ја предводи и А репрезентацијата. Уште повеќе затоа што на секоја разумна и личност со вистински вредности му докажа каков човек е и каков тренер е“, изјави Сејдини во своето обраќање.

Се вчитува...