Симе Симовски од денеска повеќе не е селектор на женската ракометна репрезентација на Македонија, откако беше донесена одлука за прекин на соработката што траеше уште од септември 2015 година. Двата убедливи порази во баражот за СП против Романија уште еднаш покажаа дека женскиот национален тим предолго „тапка во место“, па на една година пред настапот на ЕП на кое Македонија ќе игра како еден од домаќините беше донесена одлука за промена на кормилото.
„Ракометната Федерација на Македонија ја информира јавноста дека Македонската куќа на ракометот и г. Симе Симовски, на 22 април 2021 г., взаемно се спогодија да ја прекинат соработката за ангажманот на женските национални селекции. Ракометната Федерација на Македонија упатува благодарност за досегашниот ангажман на г. Симе Симовски кој ја извршуваше оваа функција непречено во периодот септември 2015 – април 2021 година. Управниот Одбор на РФМ во периодот кој следи ќе назначи нов вршител на функцијата Селектор на женските национални селекции“, објави РФМ.
Главен фаворит за нов селектор на ракометарките Марјан Колев, македонски стратег кој во последните години со успех работи во Франција. Тој моментно е шеф на стручниот штаб на францускиот клуб Ница, каде би останал да работи паралелно со ангажманот во македонскиот национален тим.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА