Подготовките на женската ракометна репрезентација на Македонија пред настапот во квалификациите за СП 2019, течат според зацртаниот план. За овој квалификациски циклус, селекторот Симе Симовски повика 20 ракометарки, меѓу нив е и бекот на Наиса, Симона Стојановска која по неколкумесечна пауза одново се враќа во националниот тим.
„Атмосферата е одлична, се е во ред, нема повредени, тренираме напорно и се подготвуваме за претстојните натпревари во квалифиакциите за СП 2019. Се следи нашиот ритам и тој систем на игра што го градиме во репрезентацијата во изминатите неколку години. Тоа е истиот принцип кој го негуваме и кој треба да придонесе да се направи успех со оваа репрезентација. Скромни сме, одиме чекор по чекор, натпревар по натпревар…“ – истакнува Стојановска.
По едногодишниот анѓажман во Полска, во тимот на Погон Шчечин, Стојановска летово се пресели во редовите на српскиот прволигаш Наиса. Трансферот во Ниш се покажа како добар потег и чекор напред во нејзината кариерата што треба да донесе бенефит и за македонската репрезентација.
„Во Наиса ми е супер. Имам поголема минутажа играм, речиси по 60 минути на секој натпревар, тоа ми е најбитно. За овие неколку месеци откако сум во Ниш, играм во добра форма и верувам дека така ќе биде и во репрезентативните настапи“ – вели Симона Стојановска.
Квалификациските натпревари за СП 2019 ќе се одиграат од 30 ноември до 3 декември, а Македонија ќе биде домаќин на групата 4 во која покрај македонскта репрезентација се уште и селекциите на Азербејџан, Исланд и Турција. Првопласираната селекција од групата обезбедува пласман во баражот за СП 2019.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
