По неодамнешната прес конференција со која го започнаа третото продолжение на кампањата „Засади желба“, пензиските друштва го засадија десеттиот Пензиски парк во гимназијата Никола Карев во Скопје.
Од Триглав пензиско друштво а.д. Скопје, КБ Прво пензиско друштво а.д. Скопје и Сава пензиско друштво а.д. Скопје објаснуваат дека оваа година симболиката и едукацијата за придобивките од членувањето во задолжителниот и доброволниот пензиски фонд ја поврзуваат со одржливоста, како актуелна тема којашто совршено ги спојува финансиската и еколошката добросостојба.
Овие два аспекти се фокус на кампањата „Засади желба за одржлива иднина“ бидејќи се основа за поквалитетен живот во пензионерските денови. Сите постапки кои ќе ги направиме како поединци и заедница во правец на одржливи решенија ќе донесат поубава иднина за сите нас.
Иако оваа година кампањата за информирање и едукација ја прошируваат со различни активности со кои ќе ја активираат заедницата во правец на одржливост, трите пензиски друштва продолжуваат со креирање Пензиски паркови како веќе препознатлив белег за нивните напори за подигнување на свесноста за долгорочните придобивки од континуираното штедење.
„Садењето на дрвја е најдобрата симболика за ефектите од навремени правилни постапки и континуирано вложување во нив за создавање на нешто убаво кое со текот на времето ќе расте и ќе се развива. Ова е исто така соодветен визуелен приказ за младите генерации кои во текот на школувањето, освен што ќе дишат малку почист воздух, ќе бидат и сведоци на развојот на дрвцата кои ги посадиле. Оттаму, по сите позитивни искуства со претходните девет Пензиски паркови, одлучивме да одвоиме време и средства за раззеленување на уште некој училиштен двор.“ – објаснуваат тие.
На средбата со учениците се обрати и директорот на СУГС гимназија „Никола Карев” – Скопје, Андреј Манолев.
„Сакам да изразам голема благодарност до пензиските друштва кои го одбраа нашето училиште, гимназијата Никола Карев – Скопје, да биде дел од кампањата Засади желба за одржлива иднина. Се надевам дека со овој позитивен пример заеднички ќе придонесеме младите да научат како да ја засадат својата иднина, да ја негуваат и да ги користат благодетите од неа. Токму ваквите општествено одговорни организации придонесуваат за подигање на свеста кај децата за здрава и еколошки чиста средина.
Ние како гимназија со години организирано ги одржуваме нашите дворни површини и го зголемуваме фондот на засадени дрвја и на тој начин активно учествуваме во здрава и чиста животна средина. Верувам дека оваа кампања ќе ги едуцира младите како и на кој начин да ја изберат, да ја негуваат и да вложуваат во својата иднина.
На крај сакам да апелирам до надлежните во пензиските друштва почесто да организираат акции од ваков вид, со што кај мадите уште повеке ќе се разбуди свеста за одржување и развој на иднината.“ – изјави директорот Манолев.
Пред да ги вклучат во акцијата за чистење на дворот, подготовка на почвата и садење на дрвјата, на учениците директно им се обратија претставниците на пензиските друштва.
„Ќе почнам со една моја изјава од пред три години од почетокот на кампањата. Велат, ако размислувате долгорочно засадете дрво, а ако размислувате уште подалеку, тогаш едуцирајте ја младината. Ние преку различни активности се трудиме да ги постигнеме и двете.
Во име на трите пензиски друштва би сакал да го споделам моето задоволство што имам можност како поранешен ученик во оваа гимназија денес да застанам пред вас и да изјавам дека навистина сум горд, што успеавме да засадиме пензиски паркови во повеќе училишта и оваа активност да прерасне во традиција, оставајќи дополнителна вредност за идните генерации.
Нашата мисија е преку ваков тип на активности да ја покренеме вашата свесност и да ве насочиме и мотивираме да не застанете тука, туку постојано да трагате по нови информации и континуирано да вложувате во својата и иднината на вашите најблиски, бидејќи иднината е посигурна кога знаете повеќе.
Кога ќе го погледнете секое засадено дрвце од вашите училишни клупи нека ве потсети на одговорната улога што ја имаме сите ние, и дека секој чекор и најмала инвестиција ќе ни се врати во иднина. Сите ние посакуваме и работиме овие активности да прераснат во традиција и да бидат наш заштитен знак кој постојано ќе не потсетува на нашата одговорна улога во планирањето на иднината.“ – изјави во своето обраќање Маријан Николовски, член на Управниот одбор на Триглав пензиско друштво.
Сите информации и активности поврзани со кампањата „Засади желба за одржлива иднина“ се достапни на веб страната www.penzija.mk
Комерцијален текст
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
