Македонскиот туристички центар Дојран в недела ќе биде домаќин на државното првенство во триатлон. Ќе бидат одржани натпреварувања во 12 конкуренции, а ќе учествуваат над 80 триатлонци. Натпреварувањето ќе се одржи со почитување на протоколите за заштита од COVID-19 информираат од Триатлон федерацијата на Македонија.
„Со голема радост ве информираме дека пред нас е долгочекуваното национално првенство во триатлон во Дојран кое ќе се одржи на 20. септември 2020 година (недела). Настанот ќе биде комплетно организиран под строги безбедносни протоколи пропишани од надлежните институции, а со цел заштита на учесниците и на сите инволвирани од коронавирусот.
Натпреварувањето кое ќе се бодува за шампионат на Македонија во триатлон е во организација на Триатлон федерацијата на Македонија и на општина Дојран. Помагатели се Агенцијaта за млади и спорт и Олимписки Комитет на Северна Македонија. На настанот ќе има над 80 учесници во 12 категории. Триатлон спортот во Македонија засилено расте и напредува и очекуваме убаво организирана и силна трка во недела во Дојран.
Ги повикуваме сите учесници на настанот, без исклучок, да ги почитуваат протоколите и мерките за заштита од COVID-19. Носењето маска, пред и по трката, е задолжително. Избегнувајте групирање, одржувајте физичка дистанца и редовно дезинфицирајте ги рацете на пунктовите кои ќе бидат поставени за таа цел.
Триатлонот во Дојран нека биде еден убав настан, каде на сите начини ќе ја докажеме спортската дисциплина и одговорност кон другите“ – стои во информацијата од Триатлон федерацијата на Македонија.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА