Кошаркарската федерација на Турција одлучи да воведе вештачка интелигенција во процесот на делегирање судии за натпревари од домашните натпреварувања.
Новиот систем треба да помогне при одредувањето на судиите, земајќи предвид големо количество податоци и однапред дефинирани критериуми. Целта е делегирањето да стане пообјективно, потранспарентно и заштитено од можни надворешни влијанија.
При предлагањето на судиските тимови, алгоритмот треба да ја анализира достапноста на судиите, нивните претходни ангажмани, оценките, искуството, формата и можните ограничувања, како и да води сметка за рамномерната распределба на натпреварите.
Сепак, вештачката интелигенција нема да суди на натпреварите ниту ќе носи одлуки за време на самите натпревари. Нејзината улога ќе се однесува на изборот и распоредувањето на судиите, додека работата на судиите на теренот и понатаму ќе биде под надзор на надлежните органи на Турската кошаркарска федерација.
Со воведувањето на ваков систем, Турците сакаат да го намалат просторот за субјективни одлуки, повторувањето на исти судии на натпревари на одредени клубови и потенцијалните судири на интереси. Истовремено, секој предлог на алгоритмот ќе може дополнително да се анализира и проверува врз основа на критериумите што влијаеле на изборот.
Конечната контрола врз процесот и понатаму ќе ја има судиската организација, додека вештачката интелигенција ќе служи како алатка што треба да ја олесни работата, да го забрза делегирањето и да ја зголеми довербата на клубовите во целиот систем.
На тој начин, Турција ќе стане една од првите кошаркарски земји што систематски ќе вклучи вештачка интелигенција во делегирањето судии. Доколку проектот се покаже како успешен, не е исклучено во иднина сличен модел да биде усвоен и од други национални лиги.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
