Фановите на Кливленд кавалирс вечерва се во шок по информацијата дека Кајри Ирвинг побарал од раководството на клубот да му биде дозволено да си замине. Причината е Леброн Џејмс, откако одличниот бек истакнал дека повеќе не сака да игра крај „кралот Џејмс“ и да остане во негова сенка како што тоа беше случај во претходните две сезони.
Ирвинг и неговиот агент денеска имале официјална средба со раководството на клубот на кое ги искажале своите барања. Според американските медиуми, дел од директорите од претходно биле запознаени со случајот, а Кливленд нема да му стои на патот на Ирвинг, туку ќе настојува што поскоро да ја разреши оваа сага. Неофицијално, најсериозен кандидат за негов ангажман е Сан Антонио, откако спарси подготвиле понуда од Пети Милс, Дени Грин и својот пик од првата рунда на драфтот во 2018 година.
Леброн Џејмс бил разочаран од ваквиот развој на настаните, но порачал дека нема намера да се меша и ќе остави раководството на клубот што поскоро да ја разреши ситуацијата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
