Македонската ракометна репрезентација денеска ги дозна ривалите во двата баражи во квалификациите за СП 2023. Нашите ракометари најпрвин во март ги очекува двомеч со селекцијата на Романија, а доколку успеат да ја минат оваа пречка, тогаш во месец април во директна пресметка со Чешка ќе одлучуваат за мундијалскиот билет.
И двата ривали се добро познати, со Романија игравме во баражот за СП 2019 и успеавме да го елиминираме овој противник, додека со Чешка во изминатите десетина години многу често се среќававме, како во квалификациите, така и во групните фази од големите натпреварувања.
„Искрено верувам дека можеме до пласман на светското првенство, и Романија и Чешка се репрезентации што можеме да ги победиме ако одиграме на највисоко можно ниво. Сепак, мислам дека сега воопшто не треба да размислуваме за Чесите, туку само за Романија и тоа како да ја минеме оваа прва пречка. Тоа е селекција со квалитетни ракометари, повторно го вратија Чави Пасквал за тренер и едно е сигурно, нема да ни биде лесно. Романците никако не смееме да ги потцениме, само со максимална ангажираност и на двете средби ќе го елиминираме овој ривал. Потоа, ќе размислуваме и за Чешка“, истакна Гоце Георгиевски, еден од најискусните во македонската репрезентација.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
