Во насока на засилена промоција на фудбалската игра на домашната сцена, ЕКИПА со избор на најдобрите од секоја рунда натпревари од ПМФЛ. Покрај тимот на колото и најдобриот играч, ќе се обидеме да ви ги доближиме и сите најинтересни моменти од секое коло, низ една рекапитулација на настаните.
==========================================================================================================================
ТИМ НА 19. КОЛО
После нешто повеќе од два месеци пауза, стартуваше вториот дел од сезоната во Првата македонска фудбалска лига. И веднаш се случи смена на врвот на табелата, со тоа што Шкупи го презеде лидерското место од Струга ТЛ. Чаирчани имаа силен старт на пролетниот дел, со 3:0 го совладаа тимот на Воска, а напаѓачот Ерик Гронер уште на првиот меч покажа дека е тоа што го бара Шкупи во нападот, после заминувањето на Адетунџи. Силен старт покажа и Брера Струмица, која можеби помалку изненадувачки го совлада Силекс и тоа во Кратово. Брегалница во драматичен финиш беше подобар од Тиквеш, а Вардар покажа дека ќе се бори за опстанокот со ремито против Гостивар. Шкендија со гол од пенал успеа да го победи тимот на Македонија ЃП, додека Работнички и Струга ТЛ ги сочуваа своите мрежи и одиграа без голови.
====================================
ИГРАЧ НА КОЛОТО: Ерик Гронер (Шкупи)
Одлично роденденско деби за напаѓачот Ерик Емануел Гронер. На својот прв официјален настап и тоа на неговиот 23. роденден. Гронер на својот прв настап постигна два гола, носејќи му на својот тим три бода, и со тоа Шкупи успеа да се искачи на првото место на табелата, со бод повеќе од Струга ТЛ и три од Шкендија.
================================
ТРЕНЕР НА КОЛОТО: Бојан Круљ (Брера)
Брера од Струмица имаше проблеми во финишот од минатата сезона, и со слабата форма се најде во долниот дел на табелата. Дојде до тренерска смена и до играчки промени во кадарот, а тоа донесе резултат уште на првиот меч. Брера славеше победа на тешкиот терен во Кратово, а Силекс го запиша првиот пораз на својот стадион, и затоа новиот тренер на Брера, Бојан Круљ е еден од заслужните за овие три бода.
==============================
ГОЛ НА КОЛОТО: Ерик Гронер (Шкупи)
Шкупи на крилата на Ерик Гронер успеа да го совлада тимот на Воска, и да ја стартува пролетта со три бода. Еден од креаторите на победата е „деветката“ на чаирскиот тим, кој успеа со два гола да ги донесе бодовите. Првиот гол е еден од најубавите на колото, со оглед дека успеа добро да се отвори, да прими топка, да го мине и излезениот Захов, и одкосо од десно да стрела во мрежата.
ЛИСТА НА СТРЕЛЦИ
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
