Ракометарите на Вардар ја вратија титулата од Суперлигата во своите витрини откако вечерва славеа на домашен терен против најголемиот ривал Е. Пелистер со убедливи 34-19.
Натпреварот почна со погодок на Дејан Манасков за водство на гостинот од 0-1. Домашните возвратија со серија од 3-0, па по четири минути игра резултатот на семафорот изнесуваше 3-1. Радивојевиќ врза два гола па многу брзо пелистерци се вратија во егал 3-3. Следуваше нова црна дупка на гостите по која со голот на Малус во 9. минута Вардар за првпат стигна до плус три (6-3).
Во следните минути се играш гол за гол, а точно на средина на првиот дел при резултат (9-7) тренерот на домашните Иван Чупиќ го повика својот прв тајмаут. По паузата домаќините за првпат сгигнаа и до плус четири (13-9) откако Митровиќ реализираше пенал во 23. минута. По ова за првпат минута одмор искористи и тренерот на гостите Алексо Лембанов.
Следуваше еден дуел меѓу Хенигман и Малус по кој ракометарот на Пелистер доби директен црвен картон. Следуваше нов гол на Малус за плус пет 14-9. До крајот на првиот дел Вардар имаше и плус шест 17-11, а на пауза се замина со резултат 18-12.
Вардар почна фуриозно и во вториот дел и со два гола во низа стигна до највисоки плус девет 21-12 во 35. минута, по што Лембанов мораше да го побара и својот втор тајм аут. Сушата на гостите продолжи и во следниот период. Пелистерци девет минути беа без погодок, а тоа доведе Вардар првпат да стигне и до двоцифрена предност (22-12). До крајот избраниците на Иван Чупиќ само рутински го приведоа мечот за конечен триумф од 34-19.
Урош Митровиќ со осум гола беше прво име во таборот на победникот, додека кај поразените Кузмановски и Радивојевиќ постигнаа по пет гола.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
