МЗТ Скопје ги стартуваше подготовките за новата сезона, за македонскиот првак специфична бидејќи за првпат по подолга пауза ќе биде дел од три натпреварувања, домашното првенство, АБА2 и ФИБА Европа купот.
Тренерот Васко Атанасов е задоволен од она што го гледа од својот тим во првата седмица од подготовките, најавувајќи добри резулати во периодот што следи.
„Подготовките се одвиваат според планот. Тимот е заедно, сите се здрави и работиме добро на адаптацијата и вклопувањето во нашиот систем. Успеавме да ангажираме играчи за кои сметаме дека добро ќе се вклопат во нашите идеи за игра. Нашата цел секогаш е иста – победа на секој натпревар, атак на секој трофеј, како и достојна презентација на Аеродром и на македонската кошарка во целост. За тоа ни треба и помошта од трибините, која сигурен сум дека нема да изостане. Заедно сме најсилни!“, вели Атанасов.
Тој даде краток коментар и за играчкиот ростер што ќе го има во новата сезона, со променети странски кошаркари, но и една важна константа – останувањето на Војдан и на Дамјан Стојановски како лидери на тимот.
„Сезонава имаме ростер кој е малку поинаков од претходните, со одлично ветеранско лидерство и играчи кои знаат што е потребно за да се победува. Секако, ќе се стремиме да бидеме агресивни на двете страни од теренот, а брзината ќе биде нешто што е клучно за нас. Како и секогаш, столбот на тимот ќе бидат Војдан и Дамјан Стојановски, а со додавањето на нашиот плејмејкер Ноа Фаракан, кој е вистински поентер на позицијата еден и ќе го надополни нашиот напад, тие ќе бидат едни од темелите на тимот. Ангажманите на искусниот центар Димитрије Николиќ и разноврсниот Лесли Варнер ќе ни дадат предност што ја немавме минатата сезона“, истакна шефот на стручниот штаб на МЗТ Скопје.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
