Баер Леверкузен лани го продаде Каи Хаверц во Челси за 80 милиони евра, но „фармацевтите“ веќе имаат ново чудо од дете во своите редови кое ги урива рекордите во Бундес-лигата.
Флоријан Вирц е кошмар за противничките дефанзивци, а 18-годишниот напаѓач со голот за триумф над Мајнц испиша уште еден рекорд, станувајќи најмлад фудбалер кој стигнал до десет бундеслигашки погодоци. Тој ја оствари оваа бројка на 18 години и 145 дена, уривајќи го рекордот што досега беше сопственост на Лукас Подолски (18 години и 353 дена). Вирц претходно го урна рекордот за најмлад дебитант во Баер Леверкузен (17 години и 15 дена), а извесно време беше и најмлад стрелец во историјата на Бундес-лигата, пред неговиот рекорд да биде урнат од Мукоко од Борусија Дортмунд.
Европските гиганти, на чело со Баерн Минхен, будно го следат развојот на овој суперталент, а во Баер Леверкузен се горди што брусат нов фудбалски дијамант во своите редови.
„Неговата еволуција е извонредна. Исто како и Хаверц, тој ќе има блескава иднина. Максимално е ефективен, се што прави, го прави на највисоко ниво“, изјави директорот на Баер, легендарниот Руди Фелер.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
