Данска уште еднаш покажа зошто важи за главен фаворит за златото на претстојниот европски шампионат откако актуелниот олимписки и светски првак триумфираше на „Златната лига“, во финалето совладувајќи ја Франција со 31-30.
Селекторот Јакобсен се мачи со повреди на неколку ракометари, но данскиот состав е добро покриен на секоја позиција, па така на денешниот меч блесна Дамгард, кој со десет погодоци беше незадржлив за „триколорите“. По полуфиналниот триумф над Норвешка, Данците вечерва повторно одиграа на највисоко ниво во текот на целиот натпревар. Тие имаа предност од 17-14 по првото полувреме, а потоа ја задржаа позитивата до самиот крај. Французите се приближија на 30-29, но Дамгард го постигна клучниот погодок пред самиот крај за да стави печат на данската победа.
Норвешка во мечот за третото место ја совлада Србија со 38-28, втор двоцифрен пораз на Србите на овој турнир. Сагосен ги предводеше Норвежаните со девет гола, додека прв стрелец на Србија беше Радивојевиќ со десет погодоци.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
