Поранешниот славен уругвајски напаѓач Диего Форлан е именуван за нов селектор на фудбалската репрезентација на Уругвај, соопшти националната фудбалска федерација.
До промената на клупата доаѓа откако Уругвај не успеа да се пласира во нокаут-фазата на неодамнешното Светско првенство во САД, Мексико и Канада, по што беше прекината соработката со аргентинскиот стратег Марсело Биелса.
Во краткото соопштение Федерацијата наведе дека 47-годишниот Форлан ќе ја преземе не само сениорската репрезентација, туку и селекцијата до 20 години.
„Диего Форлан се враќа за да го преземе водството на репрезентацијата до 20 години и на сениорската репрезентација“, се наведува во соопштението, без да бидат откриени детали за должината и финансиските услови на договорот.
Форлан е еден од најдобрите фудбалери во историјата на Уругвај. За националниот тим одигра 112 натпревари и постигна 36 голови, со што е трет најдобар стрелец во историјата на репрезентацијата. На Светското првенство во Јужна Африка во 2010 година го предводеше Уругвај до полуфиналето, а беше прогласен и за најдобар играч на турнирот.
Во својата богата клупска кариера настапуваше за неколку европски великани, меѓу кои и Интер, а сега за првпат ќе ја предводи сениорската репрезентација на својата земја. Покрај тоа, Форлан ќе ја води и селекцијата на Уругвај до 20 години на континенталниот шампионат, кој ќе се одржи во јануари 2027 година.
Diego Forlán vuelve a casa ✍🏼 pic.twitter.com/xawdXa73eB
— Selección Uruguaya (@Uruguay) August 6, 2026
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
